【洛宇戀】因拍劇而爆戀聞 湯洛雯激讚羅天宇：佢幾好又溫柔

羅天宇日前被拍到同湯鎮業姪女湯洛雯，喺元朗撐枱腳食酸辣粉，今日天宇及湯洛雯及舊緋聞女友蔣家旻，齊齊出席一個慈善接力賽活動，天宇同洛雯大方合照，兩人被指拍處境劇《愛‧回家》而撻著，爆出「洛宇戀」，兩人異口同聲否認戀情。

 

天宇今日解釋當晚只係喺元朗拍完劇收工一齊食飯，強調只係朋友感情，但就讚緋聞女友「幾好」，佢又話今次拍劇首度有感情線，依家都係專心工作。

至於洛雯就強調自己係單身一族，佢搞笑話：「我就係，佢（指羅天宇）係咪就唔知。」雖然係單身，但洛雯都大讚天宇：「幾好又溫柔」，佢笑言：「好似前輩咁教我做戲，真係追先算啦﹗」

而已有男友嘅緋聞舊愛蔣家旻就懶理兩人緋聞，不過佢就爆羅天宇曾打電話畀佢話好驚：「佢（指羅天宇）驚影響工作.......我同佢係兄妹朋友感情。」蔣家旻表示天宇為人專一，只係易惹桃花。