80後內地女 搭上陳可辛 《餃子》與梁家輝超激裸戰

至於陳可辛同田樸珺相識經過，據田樸珺之前接受訪問時，自爆同陳可辛係03年拍《三更二之餃子》而認識。

田樸珺當年就係由導演王晶請佢來港試鏡，並參演王晶電影《絕種鐵金剛》，仲簽埋香港經紀公司。未幾陳可辛監製《餃子》要搵演員試鏡，公司就推薦咗田樸珺，開頭陳可辛唔想起用佢，但竟然係導演陳果說服咗陳可辛。訪問中，田樸珺透露佢曾經同陳可辛講：「要是你當時沒用我，就失去了一個很好的朋友。」喺《餃子》裡面同梁家輝床邊肉搏嗰個，就係田樸珺，演出相當大膽。

田樸珺之後都拍過幾部港片，如04年《韓城攻略》，但大多係演花瓶角色。06年，田樸珺由香港返回內地，報讀長江商學院傳媒管理專業，又開始跟朋友做房地產投資。至於點解會認識內地房地產大亨、萬科集團董事長王石？就係靠做地產。當時盛傳田樸珺做地產項目，好似爛尾樓收購，要同房地產圈內嘅人打交道，因而認識王石。兩人交往之後，有人話王石就連衣著都「潮」咗好多，但佢係一個有婦之夫。

至於王石，原來同陳可辛亦有淵緣，有網民留言謂，陳可辛嘅父親陳銅民同王石世交，陳銅民每次到北京都會跟王石見面。依家陳可辛竟然同爸爸嘅老朋友嘅新歡——田樸珺成為「閨蜜」，緣份這回事實在太令人O嘴。

至於田樸珺嘅學歷方面，有報道話佢係中央戲劇學院導演係畢業，但有傳媒查證過，原來佢只係中央戲劇學院2000級表演系高職班學生，仲未畢業。